"Hm, gleich kummd die Bedienung, wos issin heud aweng? Glöß oddä doch Brodwöschd? A Schnizzl wär aa ned schlechd. An Sälood könnerdi obbä amol widdä essn… Oddä doch die Glöß. ...Könnä Sie glei numol widdäkumma, iich konns no ned soong..." "Ach Godderla, is des a Saamala!"

Saamala kommt vom Säumer

Je nach Schreibweis lossn sich in dem Wordd Saamala innerhalb vo 7 Buchschdoom 4 "a"s underbringa. Des is fei bemerggenswerd und werd välleichd bloß vom Aaamala gedobbd, wo 4 "a"s auf 6 Buchschdoom kumma. Des Aaamala hängd zamm mim Eimer, des Saamala allerdings ned mim "Seimer". Den gibds villeichd goä ned. Obbä den "Säumer".

A Saamala – lässt sich Zeit

Des Verb säumen bedeuded "zögern, sich verweilen, trödeln" und leided si vom middlhochdeudschn sumen her, wos sovill wie "aufhalten, hinhalten, warten lassen" maand. A Saamala is also a Berson, die vill Zeid hodd, brauchd oddä sich nimmd, um weider zu kumma. Mer konn vermuudn, dass des Herzinfarggdrisigo für Saamala deudlich niedriger is als für die Leud, dene Ihr Geduld bei der ganzn Wardderei schdrabazierd werd.

Das Saamala – und seine vielen Bedeutungen, je nach Region

Je nach lokalem Gebrauch werd dem Saamala Verschiedenes nachgsochd: In Buttenheim handeld sichs um an Menschen, der ofd wie in Gedanggn oder im Draum is. In Höchstadt bringt des Saamala bei der Ärberd nix zustande. Die Leud in Wüstenbruck im Landkreis Ansbach bezeichnen so jemanden, der langsam oddä unbeholfen is oddä sich ewich ned endscheidn konn. Bammersdorf bei Forchheim is noch ungnädicher mim Saamala. Die Bedeudung hier: fad, dräge und schdumbfsinnich. Das alles laud Fränkischem Wörterbuch der Uni Erlangen.

Verwandt: der Sämel, die Saamseel, der Saasla

Im unterfränkischen Landkreis Miltenberg lichd Mömlingen. Doddn sochd mer ned Saamala, sondern der Sämel is hier das körberlich schwächsde Kind vo der Glass. Aa die Form Saaml finded sich in Franggn. A schöne Variandn is die Saamseel, die Säumseele, wer saamseelich is, soll an gewissn Hang zur Drödelei homm. Und schließlich hommer nuch den Saasla, wie für Nordhalben in Nordoberfranggn beleechd, der Säumsler, der gildd doddn als a rechd Verdräumder. Wos ja ned des Schlechdesde sei muss...

"Und, wos griengs ezzala?" "Wos?… Äh, schdimmd iich wolld ja schaua, wossi iss. Ezz hobbi grod nuch aweng übä wos annerschds simmilierd ghobbd."

Unsere Rubrik "Fei Fränggisch"

Des mit dem fränkischen Dialekt ist ja nicht so ganz einfach - also nicht falsch verstehen! Nicht nur zwischen Nordseeküste und Allgäu tun sich die Deutschen manchmal schwer, einander zu verstehen, auch innerhalb von Bayern ist das möglich. Das liegt an der Dialektvielfalt: "das Bayerische" oder "das Fränkische" gibt es ja gar nicht - stattdessen ostfränkisch, mainfränkisch, nord-, mittel- oder südbairisch oder das Schwäbische. Holla! In unserer neuen Rubrik "Fei Fränggisch" erklärt unser Autor David Saam in seiner unnachahmlichen Art ganz allgemeine oder auch mal ganz spezielle Dialektworte.